Давайце пазнаёмімся з маімі сябрамі, якія дапамаглі стварыць гэту цудоўную і сучасную, вуррр-мяў, беларускую кнігу!

Васіль сам падобны да вялікага ката. Вельмі любіць салодкае, кожны дзень абяцае, што пачне рабіць зарадку, але ўсё штосьці замінае. Вось чым ён займаецца:  прыдумляе казкі, розныя гульні і вершы для дзяцей; праводзіць займальныя заняткі па беларускай літаратуры і тэатры; адкрывае для дзетак і дарослых хараство беларускай мовы.

Я папрасіў Васіля сабраць тут свае самыя любімыя вершыкі, калыханкі, забаўлянкі і аказалася, вуррр-мяў, што мы з Васілём любім адных і тых жа пісьменнікаў!

Яе ўсмешка такая сонечная, быццам яна і ёсць само сонейка. Надзя — мастачка-чараўніца, якая ўмее дзівоснае: вучыць дзетак маляваць, стварае ілюстрацыі для кніг.

Яе малюнкі зробяць вясёлым нават самага сумнага чалавека. Калі я чытаў вершы Якуба Коласа ці Васіля Віткі, то ўяўляў менавіта такія ж колеры і герояў, якіх стварыла цудоўная Надзея. Я ніколі не браў у лапы ні алоўка, ні пэндзаль, але ўжо за адзін урок з ёй намаляваў тлустую сімпатычную мышку, вуррр-мяў!

Гэта добры чараўнік, які ўмее стваррраць цуды і ведае ўсё пра дызайн кніг, стварыў дзівосны макет да нашай кнігі, дзе аб’яднаў малюнкі Надзі Букі і тэксты, сабраныя Васілём Дранько-Майсюк.

Дзякуючы яму, наша кніга нагадвае казачнае падарожжа па чароўным свеце беларускіх вершаў, калыханак і забаўлянак для дзяцей.

А гэта мая гаспадыня, добрая казачная фея. Яна знайшла мяне ў парку ў Лазенках, узяла дахаты, каб я для яе дачкі спяваў калыханкі і ладзіў гульні. А пасля вось што яна прыдумала: натхніла гэтую творчую, вуррр-мяў, каманду на стварэнне нашай кнігі. Знайшла Васіля, Надзю і Анатоля, дала ім чароўнай сілы, каб рэалізаваць усе ідэі.

Як мне пашанцавала з маёй гаспадыняй!